Alþjóðlegi tölvulausi dagurinn...

...er í dag. Alla veganna í mínum heimi. Var búinn að einsetja mér að snerta ekki tölvu í dag. Komst að þeirri niðurstöðu að það væri nauðsynlegt þegar ég í gær ákvað að slappa af með því að fara úr vinnutölvunni, í mína eigin tölvu. Tölvulausi dagurinn minn gengur ekki betur en svo að ég er að blogga. En mikið óskaplega var annars gott að eiga frí í dag : )

Í dag er ég líka hamingjusamur eigandi óskaplega fallegrar bókahillu og gallabuxna svo þröngra, að blóðstreymi niður í kálfa er rétt um 30%. RItstjórn síðunnar hyggst setja inn mynd af hillunni þegar hún er komin upp, svo haldiði ykkur fast. Jamm, ég lifi á brúninni sem fyrr...

Gegnum tíðina hef ég verið kallaður Kevin, Luigi, Peter og Herrin, en aldrei Nenni, fyrr en núna, af Jódísi litlu.

Síðar.

Þetta er litla kvikindið sem fékk sér Marabou súkkulaði í kvöld. Sjálf. Þetta er skottan sem faðmaði mig oft og mörgum sinnum í kvöld. Svo nægði henni ekki að sjúga eitt brjóst mömmu sinnar í einu, heldur vildi hún bæði. Þetta er stelpan sem er búin að læra að snýta sér af mér, saman snýtum við okkur eins og bændur austan úr Skaftafellssýslu gera í neftóbaksklúta. Þetta er álfurinn sem ég lofaði víst við skírn að fengi kristilegt uppeldi, pabbi hennar lét mig af þeim sökum rifja upp Faðir vorið í kvöld. Þetta er Jódís, sem dottaði sitjandi á mér áðan, með munninn fullan af hafrakexi. Og mér líður eins og það sé pabbahelgi.

Í öðrum fréttum. Uffe Elleman Jensen var hress um daginn. Höllin okkar Írisar er fundin, eftir langa og stranga leit. Á Keplersgade á Amager. Samningar til meira en tveggja ára, hafa verið undirritaðir. Nouvelle Vague tónleikar næsta þriðjudag. Mikið djöfull líður tíminn hratt og mikið djöfull geta vinnudagarnir verið langir. Annars bara allt í þessu fína : )