Latex, ábyrgð, sjálfsvirðing og seinustu dagar sumars...
Frá því ég bloggaði seinast hef ég...
- Bætt við tveimur nýjum krækjum, á feiknaskemmtilegar stúlkur,
Möttu og
Hlédísi.
- Talað við pilt sem var í leit að sjálfsvirðingu. Benti honum á Vegamót, þeir selja sjálfsvirðingu með Cesarsalatinu, hef ég heyrt.
- Talað við annan pilt í ræktinni, með fyllerísmóral. Sá stóðst próf sem fyrir hann hafði verið lagt.
- Fengið latex-streng og blóm að gjöf. Og að sjálfsögðu mátað strenginn...
- Unnið minn seinasta vinnudag uppi á RÚV. Í bili að minnsta kosti.
- Daðrað og verið freðýsa.
- Fengið kökk í hálsinn með vinnufélögunum, ótrúr þeim boðskap mínum að tilfinningar séu fyrir aumingja.
- Setið í strætó í rúman klukkutíma á leið í Smáralind; gremjan jókst í jöfnu hlutfalli við liðnar mínútur og kílómetra að baki.
Kveðjupartýið á Ölstofunni í gærkvöld var svona ljómandi skemmtilegt, margt gott fólk sem lét sjá sig.
Jóhanna leiklistarnemi blés á tal mitt um það hversu ábyrgðarlaus ég væri að vera á leið út í lönd. Hún sneri þessu við og benti á ábyrgðina sem við berum á því að njóta lífsins. Ég kaus hana ræðumann kvöldsins.
Ólympíuleikarnir fóru fram hjá mér en get samt sem áður ekki látið hjá líða að minnast á samhæfðu sundfimina... Er ekki hægt að eyða tíma og fé í eitthvað viturlegra?
Sá Super Size Me í vikunni með
Möttu,
Hlédísi og
Þóri. Svaf eftir hlé. Hún er of löng. Löng en góð. Neðri kjálkinn datt niður í gólf þegar ein mamman sagði feita pabba sinn hafa verið jarðaðan í píanókassa. Dóttirin, spikfeit, sagðist ekki eiga peninga til að grennast. Eina leiðin til að grennast er nefnilega að borða á Subway tvisvar á dag, ef þið skylduð ekki hafa vitað það. Fróðleg pæling samt um hvenær það verður leyfilegt að úthýsa feitu fólki eins og reykingafólki er úthýst í dag. Samfélagið leyfir að reykingafólk sé ofsótt og líklega verður komið veiðileyfi á feita líka eftir nokkur ár.
Matarboð hjá
Kára bróður og
Kristínu fyrr í kvöld og kúr með kettlingnum
Snuðru. Svo fer ég formlega að lýsa yfir haustkomu, hvað úr hverju. Nema hvað sumarið er jú örlítið lengra í Danmörku en á Íslandi. Fyndið hvað maður ætlar alltaf að gera margt seinustu daga fyrir brottför... Ekki eins og ég sé að fara til Afríku en samt...
Síðar.
Nótt.