hedinnha@hotmail.com +45 29 36 77 08

miðvikudagur, júlí 09, 2003

Ef það væri tengdur við mig þvagleggur væru afköst mín í vinnunni mun meiri. Kannski ég bendi þeim á að athuga þetta.
Orð dagsins er tír í merkingunni heiður og sæmd, samanber orðs-tír. Tírkunn tunga er til að mynda þekkt af því lofi sem hún veitir öðrum. Úbbs, leggjum í hann í Landmannalaugar á morgun, annað kvöld og ég á eftir að tína mig saman. Í gærkvöld fórum við í ísbíltúr aldrei þessu vant; Þórir, Matta, Arndís og ég. Sem olli því að ég gat ekki bakað snúða eins og ég hafði ætlað mér. Líf var að ráðleggja mér í fréttalestrinum í dag, ég átti að taka svona hóstapásu og hósta út úr mér á eftir á eftir nafni einhvers manns, að hann væri skápahommi. Hóst, skápur, hóst. Ég kaus að gera það ekki. Merkilegt annars hvað Íslendingum þykir erfitt að segja Impregilo.
Svo verð ég bara að vona að Þórir verði stilltur á meðan ég er að heiman. Góðar stundir.

|

þriðjudagur, júlí 08, 2003

Flest fullorðið fólk á bíl. Ekki ég enda er ég ekki fullorðinn. Ég á hjól, DBS hjól, um tuttugu vetra gamalt. Af þeim sökum var ég næstum búinn að hjóla á Elínu Hirst þegar ég sveigði fyrir hornið við tröppur Útvarpshússins. Nokkur vandræðaleg augnablik og mér leið eins og ég væri tólf. Og hún sem réði mig...
Annars rignir eld og brennisteini. Fór með Möttu á Respiro í bíó í gærkvöld því við erum menningarvitar eins og Þórir hefði sagt, eða menningarsnobbarar. Myndin var ágæt, nokkuð hæg en samt falleg og ítölsk, mikil suður-ítölsk stemning. Sem fékk mig til þess að fara beint heim að sjóða spaghettí, hveitilengjur, á miðnætti í gær, steikja fullt af hvítlauk og kryddi í ólífuolíu, velta spaghettíinu upp úr því og hrúga svo yfir þetta tonni af ekta parmesan. Hefði Þórir ekki verið sofnaður, þá hefði ég hlustað á eitthvað gamalt ítalskt og lummó, og sungið með í nostalgíunni.

|

sunnudagur, júlí 06, 2003

Núnú, kann einhver að segja, Héðinn bara farinn að blogga á hverjum degi, eða öðrum hverjum. Klukkan er að verða eitt og ég er að bíða eftir sérlegum rútubílstjóra til að fara með mér út í Keflavík að ná í Ítalahóp. Megnið af deginum í dag fór einmitt í þannig vesen. Afrekaði að fylla út farangursskýrslur í Leifsstöð með 19 ævareiðum Ítölum sem voru gjörsamlega farangurslausir og töskurnar á Charles de Gaulle í París. Þá brosir maður bara og reynir að vera sætur. Reynir að láta það fleyta sér... Sem tókst bara bærilega held ég. Svo er ætlunin að kíkja út á eftir þegar ég er kominn í bæinn. Kíkja til að mynda á Þórunni á Vínbarinn. Þórir drusla er farinn út að leika við Guggu á Húð- og kyn. Í gær fórum við nokkrir saman á pöbbarölt, Siggi, Þórir, Pétur og ég. Það var ágætt alveg. Held ég skrifi ekki um neitt annað en vinnu á þessu bloggi..

|