Í gær...

...datt ég. Mötuneyti RÚV var þéttsetið. Ég stikaði öruggum skrefum á linoleum dúknum og sá ekki kaffipollinn. Þar skrikaði mér fótur og vissi ekki af mér fyrr en í frjálsu falli. Þetta gerðist allt á örskotsstundu. Allt í einu lá ég hlæjandi á bakinu fyrir framan tvöhundruð manns. Stoltið sært. Stóð hratt upp og veifaði forsetavinki eins og Júlía nokkur Guðjónsdóttir kenndir mér fyrir mörgum árum. Hún datt líka ósjaldan á rassinn hér í denn. - Ég hef gaman að vandræðalegum uppákomum en það má eitthvað á milli vera.

Vegna alls þessa, auk fótboltans á sunnudagskvöldið, eiga hreyfingar mínar í dag fátt skylt við eggjandi hreyfingar skógarkattarins, eins og þær gera yfirleitt, alla veganna á góðum degi.

Las snilldargrein eftir Pál Ásgeir, um ,,þetta fólk". Þetta fólk í hans grein var nefnilega Íslendingar í Danmörku, ekki Pólverjar á Íslandi. Íslendingar eru Pólverjar Dana.

Mér finnst snjórinn fínn.

Og það bora allir í nefið.

Jesús, hvað hlutirnir gerast hratt...

Frá því ég bloggaði seinast, fyrir nokkrum klukkutímum, hef ég...
-farið í snjókast
-uppgötvað í mér nárann
-spilað fótbolta við 25 aðra kynvillinga
-þar uppgötvaði ég nárann
-ekkert dónalegt samt
-og svo hélt ég ég mundi deyja af mæði
-en dó ekki.

Svo hef ég líka unnið að hugmyndinni sem á eftir að gera mig ríkan. Strikamerki á enni fólks sem segir þér hvort það sé einhleypt, glaðlynt, kynvíst, hvatvíst, ungt, til í tuskið, ekki til í tuskið, leiðinlegt, sjopppulegt, falskt og þar fram eftir götunum.

Eddan var pínleg. Segi ekki meir.

Frá því ég bloggaði seinast hef ég...

- mátað kindarlegan g-streng sem ég fékk að gjöf. Strengurinn er klæðlítill og hann jarmar sé þrýst á réttan stað.
- fengið 500 gr af súkkulaði að gjöf. Líka frá Möttu, hverri annarri?
- undrast almenna málræpu Bandaríkjamanna.
- undrast það að íslensk ,,söngkona" sem ekki náði að slá í gegn fyrir sex árum á alþjóðavettvangi, skuli enn vera á forsíðum íslenskra blaða.
- teygað sveitaloftið.
- brutt lýsistöflur og sólhatt.
- skolfið úr kulda.
- notið vinnunnar minnar og hitt ósköpin öll af spennandi fólki.
- uppgötvað Rufus Wainwright. Loksins.
- drukkið nokkrar flöskur af rauðvíni.
- setið á þriðja tug funda.
- þrammað í snjónum.
- perrast.
- fengið að heyra að ég væri fordómafullur í garð Íslendinga.
- lesið Myndina af pabba. Ljót saga, illa skrifuð.