Fyndið að ef lífið er filmuræma, þá er ég bara staddur í ákveðnum ramma núna, sem sýningarvélin er að lýsa upp. Og er framtíðin þá til? Hélt kjafti í gær en ætla ekki að gera það í dag. Við Gulli fórum á sáttafund á Á næstu grösum í hádeginu í dag. Fínt. Grænn kostur er samt betri. Við Gulli vorum fínir. Er búið að líða eins og ég sé þunnur í allan dag. Tók Ölstofuvakt í gærkvöld frá 10 til 3. Hápunktur kvöldsins var þegar Ragnar og André kysstu mig bless. Takk strákar. Og þá er Fríða ofurhjúkka flogin til Prag, hún situr líklegast full í baði þessa stundina á hótelinu og prumpar, með andlitsmaska framan í sér og hefur það gott.
Nýjar krækjur komnar á síðuna, á Erlu sem er að njóta lífsins í Strassborg, með bagettu undir höndinni og á hjóli. Og svo hún Svana súper, úr kærustu og vinkvennahópi Þóris; krækja á hana átti að vera fyrir löngu komin inn.
Ég er ekki sammála því að hryðjuverkin í Madrid valdi því að vera varnarliðsins hér verði endurskoðuð af Bandaríkjastjórn, finnst tengingin eiginlega í hæsta máta ósmekkleg. (Tvöhundruð dauðir í Madrid jafngildir tvöhundruð nýjum störfum í Keflavík!) Varla búið að bera Spánverjana til grafar og þá lyftist brúnin á íslenskum molbúum því þeir halda að störfum fækki ekki úti á velli og ákveðið verði að Bandaríkjaher hverfi ekki þaðan? Oj.
Helvítis skattframtalið. Klukkan tifar. Er í Kastljósinu í kvöld og hér verður Ólafur Ragnar. Síðar.

Satt best að segja veit ég ekki hvað skal segja. Kannski best bara að halda kjafti?

Það var orðið alltof langt síðan ég sá seinast stjörnur. Þær sjást héðan frá Hvolsvelli. Skaust út á land með Kára litla bróður og Kristínu um miðjan daginn eftir ræktina og stuttan blund í glampandi sól í steinapottinum í Laugunum. Mikið þurfti maður á smásól og góðu veðri að halda eftir drunga og leiðindaveður seinustu tveggja vikna. Er ekki frá því að ég hafi fengið freknur. Klippti limgerðin hér í Njálsgerðinu hjá mömmu og pabba og var svo boðið í mat með þeim til Kára og Kristínar. Ljúft.
Gærkvöldið var alveg frábært. Kíkti í ölglas á Ölstofunni með með Þóri, Fríðu, Jóhanni og Gulla. Svana og Inga ráku inn nefið. Fríða var stjarna kvöldsins. Umræður snerust meðal annars um ljótleika nývaknaðs fólks og lygar að nývöknuðum rekkjunautum um það hversu íðilfagrir þeir séu, með stírur og slef. Hlátur. Það er verkefni Fríðu að hóa klúbbinn saman á næstunni.
Komst sjaldnar á Hinsegin kvikmyndahátíð en ég hafði ætlað mér og held það hafi ekki vakið kátínu tveggja forsvarsmanna hátíðarinnar. Þeir voru líka eitthvað að tala um að stundum virtist sem ég tímabundið missti hæfnina til eðlilegra samskipta og tjáskipta; segði hluti sem ég ætti ekki að segja og mætti í mesta lagi hugsa. Er þetta eitthvað sem ég þarf að ráða bót á? Á maður sem sagt ekki alltaf að segja það sem manni finnst? Ég er alveg ringlaður. Sterk bein. Síðar.

Fín vinnuhelgi. Nýja gefandi aloe vera jógúrtin er á bragðið eins og handkrem. Slæmt að vera lokaður inni í Útvarpshúsi í allan dag. Það var svona fjallgöngu- eða Bláa lónsveður. Það var líka kominn tími til.
Damien Rice um næstu helgi... Og svo bústaður á Flúðum á föstudeginum. Sigga systir og Þórir bæði full í gær. Síðar. Kastljós.