Næturgöltur og hartbreiker...

Því það er það sem ég er. Hið fyrra vegna þess að vinnan býður upp á það. Labbaði heim í froststillunni klukkan hálftvö í nótt eftir að hafa lokað og læst á Laundromat. Hið síðara er líka vinnutengt, upp að vissu marki. Kramdi ungmeyjarhjörtu í í vinnunni í gær. Ég er nefnilega svo mikil ráðgáta. Andrúmsloftið hefur verið lævi blandið; dálítil kynferðisleg spenna. Hún er hins vegar úr sögunni nú. Allt uppi á borði og málin rædd. (Hef ákveðið að eftir því sem Gulli verður opnari á sínu bloggi, þá verð ég lokaðri á mínu og segi ekkert nema undir rós...) Er það ekki annars ágæt leið til að halda sönsum og egóinu í lagi, að finnast allir daðra við sig?

Mér finnast umsóknarferli og almenn skriffinnskuleiðindi leiðinleg. Annars fagna ég endurkomu Þóris, hann er búinn að finna sig aftur eins og lesa má á blogginu hans. Svo finn ég barasta fyrir því að Hrönn og Sigga eru ekki lengur hér.

Held ég ætli að sjá Alfie annað kvöld...

Teygir þú þig á morgnana? Það gleyma því nefnilega margir.

Dreymdi orðtök í nótt og vaknaði með orðið hlýri á vörunum. Gengur það?

Síðar.

Spurði vin minn...

...hvort líf okkar væri innihaldslaust. Hann sagði að stundum væri bara nóg að vera, það þyrfti ekki allt að hafa tilgang, innihald, gildi o.s.fv. Kem hugsuninni líklegast ekki frá mér á skjáinn eins og ég vildi. Þetta hljómaði alla veganna vel í dag. - En sem sagt, í dag er ég, og ekkert annað.

-Í dag er ég með timburmenn.
-Í dag er ég sonur sem svarar í símann.
-Í dag brosi ég þegar ég skil ekki það sem við mig er sagt.
-Í dag skrópaði ég í jóga.
-Í dag drekk ég kaffi og bryð Panodil.
-Í dag les ég Berlingske Tidende. Kosningar í vændum.
-Í dag flissa ég með Siggu systur og Hrönn.
-Í dag fór ég með stelpunum í heimsókn í Badstuestræde til Friðriks.
-Í dag er ég barþjónn í fríi.
-Í dag steig ég í poll.
-Í dag er ég með bólu á kinninni.
-Í dag finnst mér ég vera með eins gleraugu og Kevin Costner í JFK.
-Í dag er ég...

Í gær var hins vegar allt annað upp á teningnum. Stórskemmtilegt gærkvöld með Hrönn, Siggu systur og Kidda. Fordrykkur, martini bianco, frábær matur á Sticks n' Sushi á Istedgade, miso baunir, sushi, lakkrís creme brule, hvítvín, kokkteill á Mexibar, skot á Masken, Mojito á Sirup, skrall á Pan fram eftir. Gaman.