Hví fer maður í atvinnuviðtal þegar maður ætlar sér ekki að taka starfinu ef manni er boðið það? Kitla egóið?
Dóa er afmælisbarn dagsins í dag, hún er líklegast tuttugu og tveggja. Til hamingju Dóa! Svo styttist í afmæli HH. Útvarpsvakt í dag sem aðra daga. Margar Kastljósvaktir fram undan og mun færri Ölstofuvaktir.
Í kvöld er brúðkaupsgleði hjá fríðleikspiltunum tveimur sem voru að staðfesta samvist sína í gær. Gaman.
Var ég búinn að segja að ég fór á 22 í fyrrakvöld með Fríðu, Þóri og Svönu? Tórði til að ganga ellefu en þá var ég byrjaður að vera með óráði vegna þreytu. Taland um það, ég gekk á ljósakúpul, eitt RÚV-ullarskilrúm, hurð og sjónvarp í vinnunni í gær. Er þetta þreyta eða skortur á jafnvægisskyni?

Djöfull er gaman að fara í atvinnuviðtal og rúlla því upp. Það gerði ég í morgun. Þegar þú gengur út þá veistu ekki hvort liðið er meira brosandi, þú eða hitt liðið sem yfirheyrði. Eða brostu þau kannski fullmikið? Getur verið að þetta hafi verið hlátur að mér en ekki með mér? T.d. hlegið að dönskunni minni eða þýskunni? Nei, ég útiloka með öllu þann möguleika. Gaman.
Staddur uppi í Útvarpi. Eitthvert plan með Fríðu og Þóri í kvöld. Það er ákveðið mál, held ég, sem þarf að ræða... brýnt og aðkallandi.
Og þá að öðru, hér á RÚV er fólksflótti mikill þessa dagana...
Fann skó í gær í Boss; hvíta úr kengúruskinni, mjjjöög flotta, kosta aðeins tæpa tvo tugi þúsunda íslenskra króna. Hvað ætli Eyþór segi við því?
Síðar.

Undirbúningur fyrir heimsreisu okkar Gulla er hafinn. Keypti bók um Indland í gær og er kominn hálfa leið. Held planið sé að byrja þar og svo feta okkur í átt til Siddýjar ef möguegt er.
Var svo að lesa grein um vinnufíkla í Mogganum og hún fékk sjálfan mig til að spyrja mig áleitinna spurninga. Þeir eiga náttúrulega ekkert með að vera að birta svona kjaftæði. Guði sé lof að maður á ekki eigin fjölskyldu.
Orð dagsins er t.d. óbilgjarn - það að vera ósanngjarn eða ótrauður, sá sem víkur ekki né hliðrar til, fastur fyrir.
Seinna orð dagsins er róstur eða rósta, ekki að ástæðulausu, tókst að klúðra kyninu á því um daginn. Þetta er kvenkynsorð og þýðir bardagi eða orusta.
Er einhver hættur að lesa? :)

Við Gulli skrópuðum á Pönnufundi en það gerði Þórir reyndar líka. Gulli og Guðrún buðu mér nefnilega í leikhús, mamma kom með og þar voru líka Kári og Kristín. Sáum Sporvagninn Girnd og ég var gríðarlega hrifinn. Þetta er besta sýning sem ég hef séð í langan tíma, eins og Beðið eftir Godot var nú hrútleiðinleg á sama sviði fyrir rúmu ári, þá var Sporvagninn jafnfrábær og Kvetch; alltaf á sama sviðinu í Borgarleikhúsinu. Harpa Arnardóttir kom mjög á óvart, hún var alveg frábær og svo er Sigrún Edda Björnsdóttir alltaf ákveðinn gæðastimpill, hún stóð undir væntingum. Nú langar mann bara að lesa Tennessee Williams. - Ég bið þann sem hélt Pönnuna innilegrar afsökunar á skrópinu.
Í gærkvöld var svo matarboð uppi í Kópavogi hjá Helgu, Hörpu, Atla og Möggu. Góður matur og skemmtilegt spjall. Fór í framhaldi af umræðu þar að velta því fyrir mér upp að hve miklu leyti umhverfið sem maður elst upp í, mótar mann. Hvernig persónu býr 340 manna lítið þorp til, umlukið jökli, fjöllum og sjó? Lokaða e.t.v. eða eirðarlausa? Hmmm, nú eða listfengna og bráða? Pæling. Er maður endalaust með litla plássið, Vík í Mýrdal, inni í sér?
Fór til augnlæknis í gær, þess sama og spáði því þegar ég var tveggja ára að ég yrði blindur innan nokkurra ára. Við erum fínir vinir í dag, fundum enn einn gallann sem tengist umræðu um tileygi hér um daginn. (Þetta blogg snýst orðið um heilbrigðismál) Hann Árni B. augnlæknir sagði að ég væri með slæma samsjón, vinstra er ríkjandi og hægra á erfitt með að vinna með því, sem skýrir ýmislegt, meðal annars einhverjar tilfæringar fyrir framan cameru. Það væri næstum hægt að lóga mér, svo meingallaður er ég...
Mig langar á Cold Mountain í bíó.

Til hamingju með Konudaginn stelpur, allar saman, nær og fjær.
Alma sæta, Alma sæta, Alma sæta, bara svona til að tryggja mér hana áfram í lesendahópnum. Fólk hlustar endalaust á þig ef þú talar um kosti þess og það sjálft...
Ég er að drukkna í hori og ætti í raun bara að vera heima hjá mér en ekki í vinnunni, er hálflasinn. Hvítlaukur og lýsi í kvöld. Það bætti ekki úr skák að nágranni okkar Siggu systur var með partý í nótt, þó svo ég hafi reyndar sofið eins og steinn. Held maður ætti að skríða oftar upp í fyrir miðnætti.
Í kvöld er Panna en mér er það hulin ráðgáta hver er raunverulegur handhafi Pönnunnar, veit það einhver? Tilhlökkunin er talsverð. Jói og eða Eyþór segjast vera að fara í partý til Kidda hárs. Takiði Tavs með ykkur. Gaman.
Er Kaupmannahöfn líka svona lítil eins og Reykjavík? Sjórinn er víst fullur af fiskum en vandinn er bara sá að Ísland er lítið kúlufiskabúr með ferskvatni og dælu til að halda gúbbíunum þremur lifandi. Búrið er það lítið að þeir muna eftir öllu, hringurinn sem þeir synda er ekki nógu stór til að gleyma. En þeir synda til að gleyma. Þeir þekkja samt alla hina gúbbí-fiskana í búrinu. Í því er líka ein hauskúpa og ein vatnajurt.
Tíkin hans Bush, Spot, er dauð, 14 ára að aldri. Hvíta húsið sendi frá sér yfirlýsingu þar sem segir að Bush -fjölskyldan sé harmi slegin yfir fráfalli tíkarinnar. Ég nota tækifærið og votta þeim mína innstu samúð á þessum erfiðu tímum.
Og varðandi Osama, einhver snillingurinn hvíslaði því að mér að hann væri löngu fundinn. Bush liggur bara á honum og þykist draga hann upp úr holu tveimur vikum fyrir kosningar. Vitiði til. Kenningin finnst mér góð.
Mér finnst birtan góð og nú birtir sjö mínútum fyrr með hverjum morgninum og það er næstum enn bjart þegar maður fer úr vinnu. Gott mál. Það er alltaf afrek að lifa af og þreyja íslenskan vetur. Síðar.