Átta krónur og ananas

Ég á að borga átta krónur í skatt. Vel sloppið.

Hefur verið strítt dálítið undanfarið. Tek því samt nokkuð vel, enda er ég svo heilsteyptur, sbr. Hér og nú.

Óvissuferðin með sambýlingunum Gulla og Ólöfu var stóóóórkostleg. Stórkostleg segi ég. Lögðum í hann úr bænum að morgni dags. Gengum upp með Glym, óðum yfir ána ofan við fossinn og sofnuðum í mosabolla þegar við vorum komin yfir... Grilluðum svo í rjóðri við Botnsskála í Hvalfirði, pylsur og ananas með rjómasúkkulaði. Sofnuðum aftur, alsæl, feit og pattaraleg, útötuð í sólkremi, remolaði, ananassafa og pylsufeiti... Það gerist ekki mikið betra. Brakandi logn og glampandi sól. Hraustlegt og sólbakað útlit eftir því.

Er búinn að gefa föður mínum verkefni; svara því hvenær og hvar ég hafi komið undir. Gulli kom undir á stofugólfi. Ég gæti hafa komið undir í Þórsmörk en sá gamli var ekki viss.

Grillveisla hjá Önnu og Frey annað kvöld. Vestmannaeyjar á sunnudagskvöld. Gaman...

Þar sem ég...

...stóð í Pennanum-Eymundsson og lét valkvíðann naga mig að innan, frammi fyrir titlum eins og Borðað fyrir þinn blóðflokk, Hann er ekki skotinn í þér, Lærðu að halda í hann, Sjö reglur farsæls fólks, Úr yfirvigt í kjörþyngd á viku, Ég þarf ekki börn því ég deita þau, Leyndarmál fallega fólksins, Finndu innri frið... Þegar Brynhildur vinkona stormaði inn, nýkomin til borgarinnar tækifæranna og spillingarinnar, Reykjavíkur, frá borg óttans, Lundúnum. Maríanna, enn ein vinkonan, sagðist ekki lesa svona bækur. Lífið væri nógu flókið fyrir. Hún fékk prikið mitt fyrir. Ég gekk bókarlaus út í sólina. Bækur um gerviþarfir og ekki neitt. Fussumsvei. Þess ber þó að geta að í morgun fann ég eirð í mér til að setjast niður og klára bók. Takk.

Mig langar í útilegu og fjallgöngur. Er reyndar boðinní óvissuferð í fyrramálið, með Gulla og sambýliskonu hans Ólöfu. Gaman.

Seinustur dagar í fríi í sólinni hafa verið ljúfir. Matarboð á svölunum með Þorbirni, Helga, Gulla, Frímanni, Bjarna, Þórunni og Berglindi. Skrall. Endurnar á Tjörninni. Djass og bjór á Jómfrúnni. Bókabúðir. Brjóst. Sund. Bleikir túlipanar frá Hollandi. Námslán og stúdentagarðar. Boð hjá Gulla.

Annars stendur lítil mánaðargömul frænka mín eiginlega upp úr seinustu viku. Védís Edda. Ég hef aldrei verið talinn mikið fyrir börn en er ekki frá því að það hafi hrist í mér lyppurnar þegar hún steinsvaf í klukkutíma á bringunni á mér, á föstudagskvöldið. Held ég hafi ekki setið kyrr svona lengi, í mörg ár. Það færðist svo mikil værð yfir mig, vegna þessa litla krílis. Grunnur andardráttur í hálsakotið á mér... Var annars sérlega stilltur og rólegur á Hvolsvelli hjá mömmu og pabba. Ég sem er alltaf með eitthvað í eyrunum, fréttir, tónlist, útvarpssíbylja... Ég slökkti á barasta á útvarpinu og hlustaði á mófuglana. Lá líka úti í móa aðfaranótt föstudagsins... Sól, sól skín á mig, hiti fimmtán stig. Bágt er í sólinni að brenna sig, sól sól skín á mig.

Fylgist með ævintýrum Siggu systur hér til hliðar...