Einu gleymi ég. Vegna afmælis míns á mánudaginn þá er fólki stefnt á Ölstofuna á sunnudagskvöldið, svona bara um níu, tíu. Ekkert formlegt, bara kíkja og fá sér bjór ef fólk á möguleika á því að bregða sér af bæ. Allir velkomnir... í tuttugu og tveggja ára afmælið mitt. Blússandi afneitun í gangi.
En vaktinni er annars lokið og ég á leið í bæinn að hitta Þóri, Gulla og Pétur sem sitja á Horninu. Góðar stundir.

Jibbí, útvarpsvakt fram til 23.30. Þá verður jafnvel kíkt út á lífið. Í gær var opnunarhátíð Hinsegin bíódaga. Sá Já systur, nei systur með Dagnýju, sem ég er hættur að kalla druslu. Mamma gerði athugasemd við það. Árshátíð RÚV á morgun.

Jibbí, útvarpsvakt fram til 23.30. Þá verður jafnvel kíkt út á lífið. Í gær var opnunarhátíð Hinsegin bíódaga. Sá Já systur, nei systur með Dagnýju, sem ég er hættur að kalla druslu. Mamma gerði athugasemd við það. Árshátíð RÚV á morgun.

Gríðarlega er mikill dagamunur á vinnunni minni, suma daga gengur ekkert upp, engin mál ganga en aðra þá er syngjandi gaman allan daginn og málin hrúgast inn. Gærdagurinn var sem sagt slæmur en öllu betri í dag.
Hvað gerir maður þegar vinnudagurinn er búinn kl.13.30? Reiðuleysi fram eftir degi. Dagný drusla fer með mér á opnunarhátíð Hinsegin kvikmyndahátíðar sem við erum boðin á í kvöld.

Vor í lofti, frábær dagur. Sjónvarpið með skúbb á Útvarpið um fæðingarlækninn á Heilbrigðisstofnun Suðurnesja í kvöld. Fjandinn.
Fór með Þorvaldi á Vegamót strax eftir vinnu kl.15 í dag, mjög fínt, kaka og kaffi og menn og málefni. Hittum Ölstofu-Dögg. Fór með símann minn í Símann, sá reynist vera með hugbúnaðarbilun. Vesen, þjónustan þarna er í meira lagi skrýtin. Rauk út í blíðuna og fór í GK með Svanhildi og Loga. Er að leita mér að jakkafötum, leið eins og þau væru að fara að ferma mig og þau myndu velja á mig fötin. Get ekki varist þeirri hugsun þegar ég er kallaður kútur. Þaðan röltum við Svanhildur í Sævar Karl, mátaði Armani jakkaföt og gekk um marmarann á Fratelli skóm. Hmmm. Óvanur svona fíneríi. Kastljósvakt í augnablikinu og svo Útvarp kl.6 í fyrramál. Púff. Síðar, sól í sinni.

Jibbí, ég er að fá röddina mína aftur eftir febrúarmánuð fullan af kvefi... Fyndið, miðinn á árshátíð RÚV lítur út eins og afnotagjaldsseðill og upphæðin er líka sú sama, 2586 kr. Skemmtilega kaldhæðið þar sem starfsfólk RÚV borgar ekki afnotagjald.
Heyrst hefur að félagslega sleipiefnið Guðlaugur Kristmundsson Hagabóndi sé á leið í Popptíví... Sel það ekki dýrara en ég keypti það.
Forsíðumynd DV um seinustu helgi var sorglega vel fölsuð. En mikið óskaplega eru þeir lúalegir; í dag birtist lítil klausa aftast í blaðinu þar sem þeir ,,afsaka" það að gleymst hafi að taka fram að myndin hafi verið samsett. Takk fyrir láta þá vita, sem ekki sáu í gegnum það.

Ég varð fyir því óláni að áfengi var hellt yfir símann minn þannig að ég þurfti að kaupa nýjan. Sá nýi er það fullkominn að ég get næstum rakað mig með honum fyrir utan það að nota hann sem diktafón, myndavél og útvarp. Ég er svo gríðarlega lítið tæknisinnaður að mér ofbauð leiðarvísirinn með honum sem er jafnþykkur og tvö fyrstu bindin í Sjálfstæðu fólki. Nú kann ég að kveikja á vasaljósinu á símanum, og slökkva á því líka, og er svo að glíma við útvarpið.
Hinsegin kvikmyndahátíð er að hefjast í borginni. Mér fannst gríðarlega fyndið að sjá að mér er þakkað í dagskrárriti hátíðarinnar. Það eru líklegast þakkir frá Gulla og Þóri, takk fyrir mig sömuleiðis. Margt spennandi í boði á hátíðinni.
Kosturinn við það að eiga morgunvakt í Útvarpinu og byrja klukkan sex að morgni, er sá að þú ert laus klukkan tvö eftir hádegi. Fínt. Verst hvað manni gengur illa að sofna fyrir klukkan eitt.
Enn hef ég ekki fjárfest í hvítu skónum en koma tímar... Hvítu skórnir hljóma allt að því eins og nafn á kvikmynd, sbr. Rauða skikkjan. Síðar.

Nú er liðin hátt í vika síðan þess var seinast krafist af mér að veita næturgistingu á heimili mínu, með tilheyrandi næturbrölti. Ein tíðindalaus vika án gylliboða. Þýðir það að ég er nú búinn að missa þetta, týna því sem ég hlýt að hafa haft áður?

Góðan dag á Útvarpinu elskurnar. Gærkvöldið var notalegt, þá fórum við í heilsubótargöngu, ég og Þórir sem er ígildi maka míns. Leiðin lá í Vesturbæinn, Pétur gat ekki tekið á móti okkur vegna anna í próflestri þannig að við stefndum í kaffi til vinahjóna okkar, Tröllsins og Læðunnar (ljúf frekja sbr. DV). Gott kaffi og gott kompaní. Þaðan fórum við á Kaffibrennsluna, hittum Óla Hjört. Þórir fór heim og ég rölti á Ölstofuna þar sem ég hitti Vigdísi Más, Lenu og Bato. Kvöldið einkenndist sumpart af umræðum um viðreynslur og tækni sem hægt er að beita við hana, það er hvort heillavænlegra sé að konfrontera fólk og leggja spilin á borðið eða nota gamla trixið sem flestir nota og komast upp með, að hella í sig áfengi og hefja markvisst káf og reyna að koma kossi á viðkomandi. Heillandi aðferð, íslensk og sígild sem flestir hafa beitt óháð því til hverra og hvers þeir hneigjast. Síðar.