Þankagangur...

Það er myrkur á baðinu á Borups Allé því mér hefur þótt ég hafa öðrum hneppum að hneppa en að skipta um flúorperur. Þess vegna er ég ofsalega illa rakaður. Er að hugsa um breiköpp, svolítið um hjörtu og aðeins um krabbamein og kaldlyndi líka. Finnst líka skrýtið að mannskepnan skuli ósjálfrátt geispa ef hún les frétt um geispa, svo smitandi er fyrirbærið. Síðan ég bloggaði seinast er ég búinn að hlæja innra með með mér eftir að hafa óvænt rekist á fortíðardraug, ég er líka búinn að knúsa Doru, 86 ára, borða með henni smörrebröd og eiga frábæran eftirmiðdag sem ég á lengi eftir að muna. Við Íris erum enn íbúðarlaus en samt leigusala/vinkonu ríkari. Ég er enn að melta og endurupplifa lítil atvik frá því í Japan. Og ég er búinn að hugsa um hvað mér finnst gott að láta aðra um að tala, gerði mér grein fyrir þessu á kaffihúsi í dag...

Einhver spurði hvað ég væri að gera í Kaupmannahöfn. Ég er að gera það sama og ég gerði heima, bara búinn að flytja mig um set. Annar spurði hvað giftingarskór væru. Það eru fínir, svartir leðurskór. Arnar strumpur var í þannig skóm þegar foreldrar hans giftu sig fyrir tveimur árum, þaðan er nafnið komið.

Orð dagsins er flautaþyrill. Spurning dagsins er hvort það sé gaman í Brussel... Þekkir hana einhver?

Varð bara að birta mynd af þessum snillingi. Þetta er Arnar, nýi besti vinur minn, sonur Dagnýjar og Skúla. Nammidagarnir hans eru á laugardögum og hann slettir á japönsku. Báðir eigum við giftingarskó, svokallaða. Honum þótti ég karl og honum fannst ég kalla fullorðið fólk, stelpur og stráka. Sem er auðvitað bara asnalegt. Er sumsé enn að melta Japansferðina. Sólarhringurinn er kominn á réttan kjöl. Hvernig stendur annars á því að ég virðist ekki gera annað en að þræða dýrustu borgir heims? Kaupmannahöfn, Reykjavík, Tokyo, og svo er ég á leiðinni til Ósló!

Og þá að öðru sem ég kem ekki orðum að - Jógúrtís, Íris, ákvarðanir, Íslandsbryggja, Österport, Frikki, fyrrum einhleypingar, gamlir draugar, ftp, Davíð og Bjarni, alnetið, Eimskip, Tonje, Baresso, Thorshavnsgade, Líf, Simon, Benny, Kjartan, Robert, sprungin ljósapera, enn meiri ákvarðanir, heyrnardaufur leigubílstjóri, og svo margt, margt fleira. Síðar.