Sjónvarpið klukkan 21.05 í kvöld. Jón Jósep í Heima er best. Sjá það.

Sem sagt. Var að klára útvarpsvakt. Camilla, Þórir, Róald og fleiri eru á einhverju bévítans skralli á Stúdentakjallaranum.
Var að klára fína bók, Mynd af ósýnilegum manni eftir Paul Auster. Held hún hafi höfðað til mín því hún er svo þunn, fín fyrir eirðarlausa sem eiga erfitt með lengri texta.
Orkan í eldhúsinu er mikil þessa dagana, það er svo erfitt þegar maður gengur í leiðslu fram í eldhús og veit ekki til fyrr en maður er óvart búinn að hræra í köku... Þetta kemur fyrir besta fólk, eða er það ekki? Bakaði sem sagt sjónvarpsköku í fyrrakvöld og Matta og Hlédís kíktu í heimsókn. Seint í gærkvöld var fjörutíu hvítlauksgeirakjúklingurinn með koníakinu á borðum hjá okkur systkinunum.
Augnsýkingin öll í rénun, þakka þér Pétur. Sumardagurinn fyrsti á morgun, blíðan í dag var nokkurn veginn í takt við það. Kíkti á Fabio á nýja Segafredo kaffihúsinu niðri í bæ í dag fyrir vinnu. Alvöru ítalskt kaffi og alvöru ítalskur bar. Fékk vægt nostalgíukast. Hitti Siggu systur, Ragnar og André þar. Greinilega staðurinn til að láta sig sjást á.
Ég á eins árs bloggafmæli í næsta mánuði...
Gleðilegt sumar...

Vaknaði í morgun með tryllta augnsýkingu, skóf stírur og gröft eins og smjör. En af því við systkinin erum búin að temja okkur svo óhugnanlega jákvæðan hugsunarhátt, þá glöddumst við innilega yfir morgun-espressonum, að ég skyldi yfir höfuð vera með augu. Hvílíkt lán. ,,Hugsaðu þér bara, það eru margir sem eru ekki einu sinni með augu", sagði Sigga systir í sannfæringartón. Þannig að nú uni ég sæll og glaður við mitt, með augu. Tvö. Blóðhlaupin og sokkin.
Eitt atvinnuviðtal í dag, er þetta kannski fetismi eða leynilegt áhugamál? Að fara í atvinnuviðtöl? Hvað var aftur íslenska orðið yfir fetisma? Blæti? Of margar spurningar í einni færslu? Samkvæmt orðabókinni er blæti það sem vekur kynörvun hjá ákveðnum mönnum, oft afbrigðileg örvun af einhverju tagi... : )
Og svo reynist kannski erfiðara að hætta að blogga en maður hélt? Veit ekki.
Ragnar er kominn með nýtt viðmót, nýjan ham. Líta á það. (Á íslensku má alltaf finna svar). Síðar.

Víðbjóðslega er veðrið gott.
Ágætishelgi en dálítið áfall að skralla í Reykjavík en ekki Lundúnum. Engan veginn samanburðarhæft. Grátlegt.
Helgin fór í að hitta fólk og það að berjast við dálítið eirðarleysi sem stundum gerir vart við sig á þessum tíma árs. Eirðarleysið í gærkvöld kom fram í því að ég hjólaði eins og vindurinn um götur borgarinnar á Monzu-kvenhjóli og kom víða við. Birtan gefur manni aukaorku og þá vill maður helst ekkert sofa.
Hárliði er að velta því fyrir sér að fara í nokkurra mánaða sumarfrí og hverfa af veraldarvefnum...