Kenning

Mikill trúarhiti er oft á tíðum í jöfnu hlutfalli við lága greindarvísitölu. - Ég festist nefnilega yfir Omega í nótt og horfði og hlustaði þá þá sem voru að prédika og biðja um framlög; hundrað þúsund krónur, ekki meira.

Þarna var ung stúlka og Omega var hennar haldreipi. Hún var eitthvað lítið skóluð (fordómar og rætni í HH) og mér fannst óskaplega gaman að hlusta á hana tala (,,þú veist og bara"). Svo notaði hún AMEN þar sem flest annað ungt fólk mundi segja þokkalega eða nákvæmlega, til að samsinna viðmælandanum og sýna að hún sé að hlusta. Sem sagt, í jesú nafni, áfram Omega.

Helgin er að bresta á, tvö matarboð í þessari viku, hjá Heiðu og Titti og Kamillu í fyrrakvöld. Reykjadalur í kvöld, Menningarnótt annað kvöld, Hornið á sunnudagskvöldið og út að borða með félögunum mínum í Mömmumorgnaklúbbnum á miðvikudag... Þessa vikuna hef ég hins vegar ekki haft tíma til að hugsa um annað en vinnu.

Þrettán dagar í Köben.
Síðar.

Kviknaði í borðtusku...

Dagur að kveldi kominn. Frábært matarboð hjá þeim heiðurshjónum Heiðu og Titti að vakt lokinni. Annað matarboð hjá Kamillu blibbara annað kvöld, það er í mörg horn að líta. Og svo voru norðurljós í kvöld, í ágúst! Hvað er að gerast? Hitabylgja og norðurljós með nokkurra daga millibili.
Fór á hádegisfund með Dagnýju sendiráðsritara í gær, hittumst í Laugunum og bárum saman bækur okkar af Fréttastofunni og Utanríkisráðuneytinu. Snæddum svo á þeim þekkta veitingastað Bláfjallasal í Efstaleitinu og urðum ekki fyrir vonbrigðum. Það varð ég hins vegar á Þremur Frökkum í seinustu viku; borðaði þar með Gulla, Pétri, Jon og Xavier. Ekki sáttur.
Dagný, Skúli og Arnar fóstursonur minn fara út til Tókýó eftir nokkra daga og ætlunin er að heimsækja þau í byrjun næsta árs.
Svo er fólk að þyrpast til Danmerkur, Matta fer eftir nokkra daga og þá fer Sif fljótlega, fyrrverandi klinkan glaðbeitta sem festi eitt sinn gúmmíhanska uppi í barni með víravirki uppi í sér og greip til þess örþrifaráðs að klippa á hanskann og láta sem ekkert væri.
Ég verð líklegast nágranni Írisar Ohlesen í Köben. Og þá ætlum við Skratthea að hittast fljótlega eftir að við erum komin út.

Einkennilegt í alla staði þetta Framsóknarkonumál. Mjög einkennileg líka fyrirsögn Morgunblaðsins á vefnum í gær. Kviknaði í borðtusku á eldavélarhellu. Ekki að þörf sé á slíkum fréttum, þetta hefur ekki verið gúrkusumar. Morgunblaðið lætur ekki að sér hæða. Ég held þeir eigi brunafréttir og árekstrafréttir á lager sem forrituð tölva setji á vefinn svo það líti út fyrir að einhver sé á fréttavaktinni. Alltof grunsamlegt að eldsvoðarnir verða allir lengst úti í rassgati, Dvergagili, Hamraseli, Mururima...

Vangavelta: Hverfur allt fólk af yfirborði jarðar þegar það byrjar í sambandi? Er það eðlilegt, skiljanlegt, æskilegt?

Annars er almenn fjallanostalgía í gangi, Lónsöræfin voru það einstök.

Fleira er ekki í fréttum; fréttir verða sagðar næst þegar tóm gefst til.