Snökt og eldhúsáhald

Mátti bara til með að birta mynd af þessum álfum. Fékk svo skemmtilegt símtal frá þeim eina nóttina. Eins og reyndar í nótt líka. Frá annarri vinkonu. Vorið virðist fara einstaklega vel í fólk. Allir að slá sér upp og svona...

Klukkan fimm á laugardagsmorgun var ég kjökrandi uppi í rúmi. Þá kláraði ég Flugdrekahlauparann sem ég hafði byrjað á á miðnætti. Langt síðan ég hef lesið svona góða bók, langt síðan það er eitthvað að marka lofið sem maður les á kápunni. Svana bloggaði skælandi um þessa bók um daginn. Ætlaði að lesa hana í desember en komst ekki til þess þá. Mæli með henni. Ljót en falleg saga.

Í upphafi árs keypti ég mér Peugot. Peugot gírahjól, svart, á 40 pund. Karlinn á hjólaverkstæðinu sagði mér í vikunni að ég hefði keypt köttinn í sekknum. Það var mér fyrir löngu ljóst. Gírakerfið er víst antik. Ég er búinn að leggja helvítinu þar sem næsta viðgerð svarar ekki kostnaði. Ég hefði betur keypt mér alvöru svartan Peugot 306 í upphafi árs. Kostnaðurinn hefði verið sá sami.

Sól, sól skín á mig
Hiti fimmtán stig
Bágt er í sólinni að brenna sig
Sól, sól skín á mig.

Sá sem þetta skrifar kallar ekki allt ömmu sína þegar kemur að sólbruna. Augnlok og sprellinn eru líklega verstu staðirnir til að brenna á. Í dag er ég bara brunninn á enninu. Bara.

What impact does news media have on the foreign policy decision making process?... er ritgerðarefnið sem á hausinn á mér fram á mánudag.

Farinn út í sólina...

Halelúja...

Fór í afríska messu með Lauri, sannkristnu klappstýruvinkonu minni í gærmorgun. Í sama húsnæði og ræktin mín. Musteri Jesúss og Adonis, undir sama þaki. Fallegt. Ógurlega gaman fyrst, stuð, dans og læti og vinalegt fólk. Minna gaman þegar hvítur, miðaldra ístrubelgur, nýkominn úr tveggja ára löngu námi úr Biblíuskóla í Tulsa, hóf að prédika. Hann sýndi okkur myndir af mótorhjólinu sínu, Benzinum, húsinu, fallegu dætrunum og skjallaði kengbiluðu konuna sína sem sat á fremsta bekk, í dragt úr fjólubláu gardínuefni. Amen. Þvílíku djöfulsins beinasnarnir og heilaþvotturinn. Svo þrumaði hann: ´Samkynheigðir eru ekki beint skíturinn undir skónum ykkar en þeir breyta rangt, þeir syndga´. Undir þessu sátum við Lauri og mér leið eins og ég væri bersyndugasti maður Norðan Alpafjalla. Og bálreiður. Læddumst út fyrir rest, út í rigninguna, svo lítið bæri á.

Filmubúturinn er frá Sri Lanka í janúar, þar sem allt er að fara til andskotans.