Já, kynntist Þorbjörgu, kærustu Vignis í Írafári um helgina. Eftir að ég var búinn að dissa kærastann hennar. Svo var ég kynntur fyrir henni. Tjáði henni að mér þætti hann frekar þéttholda, að hann væri ekkert að gera fyrir mig, gersneyddur kynþokka og þar að auki hefði ég unnið hann margoft á íþróttamótum í gamla daga þegar við vorum báðir landsbyggarlúðar í langstökki á hérðasmótum og svona. En við höfðum bara gaman að.
Og Gulli spáði fyrir mér áðan í tarotspil. Hm, hvað skal segja, ætti líklega að fara út núna í langan göngutúr og melta allt sem hann sagði... Ekkert bólar enn á stjórnmálaskýringum hér á síðunni enda ekki vona á þeim í bráð. Sá að sumir eru með tilvitnanir úr dægurlagatextum og enn aðrir eru með frægakalldagsins sem rambar inn í bókabúðina til bloggarans. Ég gæti hins vegar verið með nýyrði dagsins auk þess sem ég bendi reglulega á góða tónlist sem er áheyrnarinnar virði. Maður er svo mikill íslenskumaður. Nýyrðið mundi auka orðaforða lesenda til muna og gera orðræðu þeirra blæbrigðaríkari í dagsins önn. Orð dagsins er sem sagt ambindrylla og er merking þess ómyndarlegur, óhagvirkur kvenmaður. Nú eða vesalingur til líkama og sálar. Njótið vel.

Jæja, helgin var svona miðlungs viðburðarík. Kíkti út á föstudaginn, m.a. á Kaffibarinn en þangað fer maður ekki oft. Hitti Þóri og félaga og Þórir var einmitt búinn að smakka það og kominn í skemmtilega gírinn. Ég hins vegar bragðaði ekki dropa, áfengislaus helgi hjá mér. Ég var orðinn svo óskaplega blautur á tímabili. Var búinn að gleyma hvað það er gaman að hitta fyrrverandi gaura á djamminu, jafnast ekkert á við það. Tala nú ekki um þegar þeir eru á heimleið með núverandi kjötstykki með sér... Fær mann til að muna að maður er bara númer, þá vil ég vera númer sjö því einu sinni var það uppáhaldstalan mín. Þórir kom svo hingað á Hverfisgötuna til okkar Siggu og lognaðist út af í sófanum. Í gærkvöld var ég að springa úr mínu reglulega króníska eirðarleysi og vanalega ráðið við því var auðvitað að fara út að hlaupa sem ég og gerði; í rigningunni, óskaplega gott. Svo sumarlegt. Annars er ég búinn að horfa á fyrstu tvær í Godfather trílógíunni núna um helgina og bæti e.t.v. þeirri þriðju við í kvöld. Þetta er svona skylduáhorf. Dálítið langdregnar reyndar en góðar. Sikileyskar konur eru hættulegri en byssur, það kemur fram þar, m.a.s. ég get vottað það. Skrýtið líka þegar maður er nýbúinn í prófum og hefur allt í einu ekkert að gera, ræður sjálfum sér alveg. Svo á ég líka bara þrjá daga eftir í vinnunni og þá taka ný verkefni við. Er m.a. að fara að leggja stund á mjög intensífan daður- og viðtalstæknikúrs 103 hjá Læðunni, hlakka mikið til, til mikils er að vinna og lærimeistarinn margverðlaunaður. Ég allt að því sakna Læðunnar en hún einmitt brá sér í sauðburð eitthvert lengst út í buskann, út á land.
Sniðugir svona teljarar á síður, ég og mbl.is erum með svipaðan fjölda ,,fletta" sýnist mér fljótt á litið, svona kalt mat og ég get ekki annað en verið sáttur við það. Fór með RB vinkonu á labb í miðbænum í gær, Þorbjörn sonur hennar var með þannig að ég var í svona pabbaleik. Í hádeginu í dag fór ég svo í brunch á Brávallagötuna til Gígju og Gunnars, mjög fínt. Fór þangað á DBS fáknum sem okkur Siggu systur áskotnaðist um daginn. Hún flytur út á morgun og ég hálfkvíði því, við erum svo ágæt saman. Druslan hann Þórir kemur í hennar stað...

Mig langar í kommentakerfi...

Fyndið, ég er ekki jafnpólitískur og Gulli þannig að ég verð ekki með stjórnmálaskýringar hér á síðunni. Hins vegar er ég mikið tónlistargúrú, alla veganna hefur mér alltaf sýnst svo, þó svo Þóri finnist það ekki. Ég held ég ætti að benda á góða tónlist, rétt eins og hann, hann hefði örugglega gaman að því. Lagið Stór orð með Stjórninni var alltaf gott. Nú eða Vængbrotin ást með Sigrúnu Evu. Og úr því ég er kominn af stað, Í tangó með Eddu Borg og goðinu skáeyga Björgvini Halldórssyni...,,Í tangó, tangó, tangó"

Sæl hommarassgöt nær og fjær, er á aukavakt uppi í vinnu fyrir hana Lovísu. Er enn að hlæja að því illkvittna slúðri að synir Ingibjargar Sólrúnar og Dabba séu að slá sér upp, illar tungur. Það var þá loksins að fólk af þeirra ættum náði saman. Fór í munnlegt enskupróf í dag, tókst bara nokkuð vel ef ég á að segja eins og er. Það var helst að ég vissi ekki hvernig súrsað hvalrengi væri á ensku, eða þá snjór ofan snælínu á jökli... Svona er maður nú mikill auli. Mitt mál er auðvitað ítalskan og ég snobba fyrir öllu sem ítalskt er, borða ítalskt og leita að ítölsku menningarefni og hönnuðum og slíku : ) Það segir Þórir alla veganna en hann einmitt kíkti í vöfflur í fyrrakvöld. Eftir prófið hljóp ég í ræktina þar sem ég hitti Þorvald, skoðuðum pínu stráka, eins og vanalega. Og hljóp svo í vinnuna. Hildur vinkona var að bjóða mér með í fjallgöngu á laugardagsmorguninn, á Helgafell á Reykjanesi. Ég iða, ég hlakka svo til. Ætla í klippingu á föstudaginn og jafnvel að versla einhver fataplögg ef svo ber undir, kannski klukku með bekk nú eða einhvern fallegan skófatnað; þá sjaldan maður lyftir sér upp. Maður fékk nú orlof um daginn, það er að koma sumar og svo er maður á svínbullandi launum hjá ríkisstofnun; alltaf á uppleið. Pétur Snæ er kominn til landsins frá Kóngsins Kaupmannahöfn, heyrði í honum í dag og það var ógurlega gaman. Hann þarf maður að hitta og fá að heyra hvað drengurinn hefur verið að bardúsa seinustu misseri. Nú er hún Svanhildur, þessi elska, búin í prófum. Hélt það yrði missir í henni en hún er bara komin á nýjan stað í húsinu. Gott hún fer ekki langt, snótin. Og já, svo er Valgerður, hinn geðþekki fréttamaður sjónvarps, að safna fólki í ferð yfir Laugaveginn í sumar og ég er búinn að melda mig í hana, það verður gaman að labba hann en hef lengi stefnt að því. Úbbs, þetta geta varla verið sundurlausari skrif hjá mér... hehe. Góðar stundir.